“Non fai falla ir ata as orixes dos instrumentos para darnos conta de que os primeiros en ser empregados polos nosos gaiteiros estaban elaborados a partir de materiais que se atopan virxes na natureza. Aínda non hai tantos anos que coas follas, pallas, canas, sabugueiro, cabazas… se confeccionaban moitos instrumentos arcaicos que emitían sons puros e harmoniosos que influían na enerxía vital das persoas…” Así fala na introdución deste libro, o recentemente falecido Diego Manuel Riobó Martínez concelleiro de Cultura moañés entre o 2007 e o 2011, e alumno de gaita durante vinte anos do autor do libro.

Na tarde do sábado 11 ás 18:00h., o Centro Cultural Rosalía de Castro (rúa do Latón 10, Domaio - Moaña) ha acoller a presentación libro escrito polo mestre gaiteiro Xabier Blanco, O gaiteiro verde, amenizada cos sons de obxectos do monte ou a leira. Arestora, Xabier é o responsable da Aula de catalogación de instrumentos, situada na Biblioteca Daniel Castelao de Quintela, onde se gardan máis dun milleiro de instrumentos.